ថ្ងៃទី ១៨ កក្កដា លោកស្រី ត្រាន់ធីថាញហឿង អនុលេខាបក្ខភាគខេត្ត ប្រធានគណៈប្រតិភូរដ្ឋសភា ប្រធានគណៈកម្មាធិការរណសិរ្សមាតុភូមិវៀតណាមខេត្តអានយ៉ាង រួមជាមួយគណៈប្រតិភូមូលដ្ឋានបានទៅសួរសុខទុក្ខ និងជូនអំណោយដល់អ្នកមានសគុណជាគំរូចំនួន ៦ នាក់នៅសង្កាត់ឡុងស្វៀន។
ជាក់ស្តែង គណៈប្រតិភូបានអញ្ជើញទៅសួរសុខទុក្ខ និងជូនអំណោយដល់យុទ្ធជនពិការក្នុងសម័យសង្គ្រាមចំនួន៦រូប រួមមាន៖ លោក ទ្រីញង្វៀនញូ (អតីតសមាជិកគណៈអចិន្ត្រៃយ៍បក្ខភាគខេត្ត អតីតប្រធានគណឃោសនាការអប់រំបក្ខភាគខេត្ត អតីតប្រធានស្ថានីយ៍វិទ្យុ និងទូរទស្សន៍អានយ៉ាង) លោក ត្រាន់មីញហ្វា (យុទ្ឋជនពិការសុខភាពធ្លាក់ចុះ ៩៥%) លោក ង្វៀនវ៉ាន់ហៀវ លោក ត្រាន់មីញហៃ លោក ង្វៀនគ្វីភី និងលោកស្រី វ៉ធីគ្វេ។
នៅកន្លែងនីមួយៗ ថ្នាក់ដឹកនាំបក្ខភាគខេត្ត និងគណៈកម្មាធិការប្រជាជនសង្កាត់ ឡុងស្វៀន បានស្តាប់និយាយរឿងរ៉ាវក្នុងចិត្តនិងការចែករំលែកអំពីដំណើរការប្រយុទ្ធ ស្ថានភាពសុខភាព និងជីវភាពរស់នៅប្រចាំថ្ងៃបច្ចុប្បន្នរបស់យុទ្ឋជនពិការ។ សមមិត្តនារី ត្រាន់ធីថាញហឿង បានសំដែងថា ដំណើររឿងរបស់អ្នកមានសគុណម្នាក់ៗបានបង្ហាញយ៉ាងច្បាស់នូវភក្តីភាព ភាពមិនចុះញ៉ោម និងការប្រកាន់ខ្ជាប់អស់ពីចិត្តចំពោះបក្ស និងបម្រើបដិវត្តន៍។ ទោះបីជាពិការក៏ដោយ ក៏នៅតែខិតខំឈានឡើងធ្វើអាជីវកម្មនិងចិញ្ចឹមកូនចៅឲ្យក្លាយជាអ្នកមានទេពកោសល្យ។ បុគ្គលម្នាក់ៗគឺជាទ្រព្យសម្បត្តិដ៏មានតម្លៃរបស់សង្គម ជាមោទនភាពនៃមាតុភូមិ និងប្រទេសជាតិ ចាំបាច់ត្រូវតែបន្តអប់រំយុវជនជំនាន់ក្រោយអំពីប្រពៃណី ដើម្បីធ្វើជាគំរូល្អសម្រាប់សង្គមជាតិទាំងមូល។
ខាងមូលដ្ឋាន ចាំបាច់ត្រូវតែទៅសួរសុខទុក្ខជាប្រចាំ លើកទឹកចិត្តខាងស្មារតី ក្តាប់បានមនោគតិ និងអារម្មណ៍របស់អ្នកមានសគុណ និងក្រុមគ្រួសារ ដើម្បីស្នើរសុំដំណោះស្រាយ និងគាំទ្របានទាន់ពេលវេលា។ តាមរយៈនោះ ពង្រីកប្រពៃណី “ផឹកទឹកនឹកប្រភពដើម” ក្រមសីលធម៌ “ហូបផ្លែនឹកដល់អ្នកដាំ” របស់បក្ខភាគ អាជ្ញាធរ កងទ័ព និងប្រជាជនខេត្តអានយ៉ាង បង្ហាញពីការដឹងគុណចំពោះការលះបង់ និងពលីកម្មរបស់យុទ្ធជនពលី យុទ្ធជនពិការ និងអ្នកមានសគុណចំពោះបដិវត្តន៍ក្នុងបុព្វហេតុតស៊ូរំដោះជនជាតិ បង្រួបបង្រួមជាតិ កសាង និងការពារមាតុភូមិ៕
ប្រែ៖ ណារីពៅ
