នៅថ្ងៃទី២១ ខែឧសភា ក្រុមប្រឹក្សាប្រជាជនខេត្តអានយ៉ាង នីតិកាលទី១១ អាណត្តិ ២០២៦-២០៣១ បានបើកសម័យប្រជុំលើកទី២ (សម័យប្រជុំឯកទេសបទ) ដើម្បីពិចារណា និងសម្រេចលើបញ្ហាមួយចំនួនដែលស្ថិតនៅក្នុងសមត្ថកិច្ចរបស់ក្រុមប្រឹក្សាប្រជាជនខេត្ត។ លោក ង្វៀនថាញ់ញ៉ាន អនុលេខាប្រចាំការបក្សខេត្ត ប្រធានក្រុមប្រឹក្សាប្រជាជនខេត្ត ធ្វើជាអធិបតីក្នុងកិច្ចប្រជុំ។លោក ហូវ៉ាន់ម៉ឹង សមាជិកគណៈកម្មាធិការមជ្ឈិមបក្ស អនុលេខាបក្សខេត្ត និងជាប្រធានគណៈកម្មាធិការប្រជាជនខេត្ត អញ្ជើញចូលរួមកិច្ចប្រជុំ។
ថ្លែងមតិក្នុងកិច្ចប្រជុំ លោក ង្វៀនថាញ់ញ៉ាន ប្រធានក្រុមប្រឹក្សាប្រជាជនខេត្ត បានមានប្រសាសន៍ថា សម័យប្រជុំនេះកំពុងធ្វើឡើងនៅពេលដែលខេត្តអានយ៉ាង ផ្តោតការយកចិត្តទុកដាក់យ៉ាងខ្លាំងទៅលើគោលដៅនៃការពន្លឿនការអភិវឌ្ឍសេដ្ឋកិច្ចសង្គមនៅឆ្នាំ ២០២៦។
បន្ទាប់ពីត្រីមាសទីមួយ នៅមានសម្ពាធយ៉ាងច្រើនជាមួយគោលដៅកំណើន ខេត្តបានពិនិត្យ និងកែសម្រួលសេណារីយូអភិវឌ្ឍជាបន្ទាន់ ដោយកំណត់ច្បាស់កម្លាំងជំរុញកំណើន និងតំបន់ដែលមានដីនៅទំនេ បណ្តាគម្រោងសំណង់ និងភារកិច្ចសំខាន់ៗដែលចាំបាច់ផ្តោតលើជាបន្ទាន់នៅក្នុងត្រីមាសទីពីរ និងត្រីមាសដែលនៅសល់នៃឆ្នាំ។
“នេះជាពេលវេលាដែលរាល់ផែនការត្រូវផ្តោតខ្លាំងលើការដោះស្រាយការលំបាក និងដោះស្រាយរលូនធនធាន និងការបង្កើតការផ្លាស់ប្តូរជាក់ស្តែងក្នុងការអនុវត្ត”។ ដោយមិនត្រឹមតែសម្រេចចិត្តក្នុងគោលដៅប៉ុណ្ណោះទេ ប៉ុន្តែត្រូវមានសកម្មភាពម៉ឺងម៉ាត់។ មិនត្រឹមតែចេញយន្តការនោះទេ យន្តការទាំងនោះត្រូវតែអនុវត្តជាក់ស្តែង។ហើយលទ្ធផលចុងក្រោយត្រូវតែវាស់ដោយការអភិវឌ្ឍរបស់ខេត្ត” លោក ង្វៀនថាញ់ញ៉ាន ប្រធានក្រុមប្រឹក្សាប្រជាជនខេត្តសង្កត់ធ្ងន់។
នៅក្នុងកិច្ចប្រជុំ ក្រុមប្រឹក្សាប្រជាជនខេត្តបានសម្រេចដកលោក ង្វៀន វ៉ាន់ង៉ាញ់ ឧត្តមសេនីយ៍ទោ និងជាមេបញ្ជាការនៃបញ្ជាការដ្ឋានយោធាខេត្តអានយ៉ាង ចេញពីតំណែងជាសមាជិកគណៈកម្មាធិការប្រជាជនខេត្តអានយ៉ាង សម្រាប់អាណត្តិ ២០២៦-២០៣១ ដោយសារលោកត្រូវបានផ្ទេរសម្រួល និងតែងតាំងជាមេបញ្ជាការនៃបញ្ជាការដ្ឋានយោធាខេត្តកាម៉ៅ។ ទន្ទឹមនិងនោះ បោះឆ្នោតជ្រើសតាំង លោកឧត្តមសេនីយ៍ឯក ង្វៀន វ៉ាន់ហ៊ុង មេបញ្ជាការនៃបញ្ជាការដ្ឋានយោធាខេត្តអានយ៉ាង ជាសមាជិកគណៈកម្មាធិការប្រជាជនខេត្តអានយ៉ាង អាណត្តិឆ្នាំ២០២៦-២០៣១។
ទន្ទឹមនិងនោះ ក្រុមប្រឹក្សាប្រជាជនខេត្តបានពិចារណា និងសម្រេចលើបញ្ហាសមាជិកភាពស្ថិតក្នុងសមត្ថកិច្ច ព្រមទាំងអនុម័តលើសេចក្តីសម្រេចសំខាន់ៗចំនួន ១២ ដែលបម្រើតម្រូវការក្នុងការអភិវឌ្ឍសេដ្ឋកិច្ចសង្គមរបស់ខេត្ត។
យោងតាមនោះ ក្រុមប្រឹក្សាប្រជាជនខេត្តបានអនុម័តសេចក្តីសម្រេចចិត្តដែលចែងអំពីគោលនយោបាយដើម្បីគាំទ្រដល់ការប្រយុទ្ធប្រឆាំងនឹងការនេសាទខុសច្បាប់ មិនរាយការណ៍ និងមិនតាមបទបញ្ញតិ (IUU) របស់ខេត្តអានយ៉ាង។ សេចក្តីសម្រេចបានចែងអំពីអត្រាថ្លៃសេវាសូន្យដុងសម្រាប់ថ្លៃសេវាដែលស្ថិតក្នុងសមត្ថកិច្ចសម្រេចរបស់ក្រុមប្រឹក្សាប្រជាជនខេត្ត នៅពេលផ្តល់សេវាសាធារណៈតាមអ៊ីនធឺណិតនៅក្នុងខេត្តអានយ៉ាង។ សេចក្តីសម្រេចចិត្តបានចេញបទប្បញ្ញត្តិស្តីពីគោលការណ៍ លក្ខណៈវិនិច្ឆ័យ និងបទដ្ឋានបែងចែកសម្រាប់ដើមទុនវិនិយោគសាធារណៈពីថវិកាមូលដ្ឋាន ដំណាក់កាល ២០២៦-២០៣០ នៅក្នុងខេត្តអានយ៉ាង។សេចក្តីសម្រេចចិត្តនេះអូសបន្លាយពេលអនុវត្តនិងបញ្ចេញថវិកាផែនការវិនិយោគទុនពីថវិកាមជ្ឈិមនៅ ២០២៥ មកឆាំ្ន ២០២៦ នៅក្នុងខេត្តអានយ៉ាង។
សេចក្តីសម្រេចចិត្តស្តីពីការសម្រេចគោលការណ៍បំបែគោលដៅប្រើប្រាសព្រៃឈើទៅជាគោលដៅប្រើប្រាស់ផ្សេងទៀតសម្រាប់ការអនុវត្តគម្រោងវិនិយោគអាងស្តុកទឹកយឿងដុង ២ - គម្រោងសមាសភាគវិនិយោគសាងសង់សំណង់។ សេចក្តីសម្រេចចិត្តនៃសេចក្តីសម្រេចគោលការណ៍បំបែគោលដៅប្រើប្រាស់ព្រៃឈើទៅជាគោលដៅផ្សេងដើម្បីអនុវត្តគម្រោងខ្សែបណ្តាញអគ្គិសនី ១១០គីឡូវ៉ុល ភូក្វឹក - ភូក្វឹកខាងជើង ខេត្តគៀនយ៉ាង (សព្វថ្ងៃជាខេត្តអានយ៉ាង)។ សេចក្តីសម្រេចចិត្តស្តីពីការកែសម្រួល និងកាត់បន្ថយអត្រាការប្រាក់សម្រាប់ប្រាក់កម្ចីក្រោមកម្មវិធីឥណទានគោលនយោបាយមួយចំនួនពីថវិកាមូលដ្ឋានប្រគល់ឲ្យសាខាធានាគារគោលនយោបាយសង្គមខេត្តអានយ៉ាង។
សេចក្តីសម្រេចចិត្តបានកំណត់កម្រិតចំណាយសម្រាប់ធានាកិច្ចព្រមព្រៀងអន្តរជាតិនៅខេត្តអានយ៉ាង។ សេចក្តីសម្រេចចិត្តកំណត់កម្រិតចំណាយសម្រាប់ការអនុវត្តភារកិច្ចនៃកម្មវិធីជាតិដើម្បីគាំទ្រដល់ធុរកិច្ចក្នុងការលើកកម្ពស់ផលិតភាព និងគុណភាពផលិតផលនៅខេត្តអានយ៉ាងក្នុងដំណាក់កាល ២០២៦-២០៣០។ សេចក្តីសម្រេចចិត្តកំណត់កម្រិតគាំទ្រក្នុងការបង់ធានារ៉ាប់រងសុខភាពសម្រាប់អ្នកមានកិត្យានុភាពក្នុងតំបន់ជនរួមជាតិភាគតិចក្រៅមុខសញ្ញាដែលបានបង់ដោយថវិការដ្ឋនិងគាំទ្របង់ធានារ៉ាប់រងសុខភាពនៅក្នុងខេត្តអានយ៉ាង។ល។
ថ្លែងមតិបិទក្នុងកិច្ចប្រជុំ លោក ង្វៀនថាញ់ញ៉ាន ប្រធានក្រុមប្រឹក្សាប្រជាជនខេត្ត បានមានប្រសាសន៍ថា សេចក្តីសម្រេចចិត្តដែលបានអនុម័តនៅក្នុងកិច្ចប្រជុំនេះមិនត្រឹមតែដោះស្រាយតម្រូវការបន្ទាន់ប៉ុណ្ណោះទេ ថែមទាំងកែលម្អបន្ថែមទៀតនូវយន្តការ និងលក្ខខណ្ឌចាំបាច់ ដើម្បីជំរុញកំណើន ដោះស្រាយធនធានមនុស្ស បង្កើនប្រសិទ្ធភាពគ្រប់គ្រង ប្រតិបត្តិការ និងបង្កើតមូលដ្ឋានគ្រឹះសម្រាប់ផ្សព្វផ្សាយអនុវត្តភារកិច្ចសំខាន់ៗនៃអាណត្តិថ្មីផងដែរ។
ជាពិសេស ការចេញគោលនយោបាយដើម្បីគាំទ្រដល់ការប្រយុទ្ធប្រឆាំងនឹងការនេសាទខុសច្បាប់ មិនរាយការណ៍ និងមិនគោរពតាមបទបញ្ញតិ(IUU)បានបង្ហាញពី ការប្តេជ្ញាចិត្តនិងការទទួលខុសត្រូវខាងនយោបាយរបស់ខេត្តក្នុងការធ្វើការជាមួយប្រទេសដទៃទៀត ដើម្បីលុបចោលការព្រមានកាតលឿងរបស់គណៈកម្មការអឺរ៉ុប។ នេះមិនត្រឹមតែបញ្ហាដោយឡែករបស់វិស័យនេសាទ ឬរបររកទទួលទានរបស់អ្នកនេសាទប៉ុណ្ណោះទេ ប៉ុន្តែវាក៏ទាក់ទងដោយផ្ទាល់ទៅនឹងកិត្យានុភាពជាតិ រហូតដល់កិច្ចសន្យារបស់វៀតណាមចំពោះសហគមន៍អន្តរជាតិក្នុងការអភិវឌ្ឍការនេសាទប្រកបដោយការទទួលខុសត្រូវ ដោយចីរភាពនិង គោរពតាមច្បាប់អន្តរជាតិ។
លោកប្រធានក្រុមប្រឹក្សាប្រជាជនខេត្ត បានស្នើឲ្យណៈកម្មាធិការប្រជាជនខេត្ត មន្ទីរ ផ្នែកពាក់ព័ន្ឋ និងមូលដ្ឋាននានា ឲ្យអនុវត្តសេចក្តីសម្រេចចិត្តទាំងនោះឲ្យមានលក្ខណៈជាក់ស្តែងជាបន្ទាន់ដោយផែនការនិងកម្មវិធីសកម្មភាព និងដំណោះស្រាយអនុវត្តជាក់លាក់ ដោយធានាថាការងារច្បាស់លាស់ ដំណើរការច្បាស់លាស់ ការទទួលខុសត្រូវច្បាស់លាស់ និងលទ្ធផលច្បាស់លាស់។ ហើយលោកក៏ស្នើឲ្យបណ្តាគណៈ បណ្តាក្រុមប្រតិភូ និងបណ្តាគណប្រតិភូនៃក្រុមប្រឹក្សាប្រជាជនខេត្ត បន្តអនុវត្តតួនាទីឃ្លាំមើល តាមដានយ៉ាងដិតដល់នូវការផ្សព្វផ្សាយអនុវត្តសេចក្តីសម្រេចចិត្តទាំងនោះ ហើយឆ្លុះបញ្ចាំងទាន់ពេលវេលាអំពីបញ្ហាលំបាក និងបញ្ហាទាក់ទិនដែលកើតមានក្រៅផែនការជាក់ស្តែង ដើម្បីដោះស្រាយជាមួយគ្នា និងកែតម្រូវឲ្យសមស្រប៕
ប្រែ៖ ណារីពៅ
