ព្រឹកថ្ងៃទី១០ ខែកញ្ញា គណៈកម្មាធិការប្រជាជនខេត្តអានយ៉ាង បានទទួល និងធ្វើការជាមួយគណៈប្រតិភូខុទ្ទកាល័យតំណាង JETRO នៅទីក្រុងហូជីមិញ ដើម្បីស្វែងយល់អំពីទិដ្ឋភាពទូទៅនៃការអភិវឌ្ឍន៍សេដ្ឋកិច្ច និងគោលនយោបាយគាំទ្រធុរកិច្ចរបស់ខេត្ត។
លោក ហូវ៉ាន់ម៉ឹង សមាជិកបំរុងគណៈកម្មាធិការមជ្ឈិមបក្ស អនុលេខាបក្ខភាគខេត្ត ប្រធានគណៈកម្មាធិការប្រជាជនខេត្តធ្វើអធិបតីកិច្ចប្រជុំ បណ្តាមន្ទីរផ្នែកពាក់ព័ន្ធ និងមជ្ឈមណ្ឌលជំរុញវិនិយោគ ពាណិជ្ជកម្ម និងទេសចរណ៍បានចូលរួមផងដែរ។ ភាគីខាងខុទ្ទកាល័យតំណាង JETRO នៅទីក្រុងហូជីមិញ មានលោក Okabe Mitsutoshi - ប្រធានតំណាងការិយាល័យ JETRO ដឹកនាំគណៈប្រតិភូនឹងសមាជិកជាច្រើនរូបទៀតចូលរួម។
នៅក្នុងកិច្ចប្រជុំ លោក Okabe Mitsutoshi ប្រធានតំណាងខុទ្ទកាល័យ JETRO បានមានប្រសាសន៍ថា អង្គការជំរុញពាណិជ្ជកម្មនៃប្រទេសជប៉ុន(JETRO) ដែលបានបង្កើតឡើងដោយរដ្ឋាភិបាលជប៉ុននៅក្នុងឆ្នាំ ១៩៨៥ ជាទីស្ថាប័នជំរុញពាណិជ្ជកម្មក្រោមការគ្រប់គ្រងរបស់រដ្ឋាភិបាល។JETRO បានចាត់ភារកិច្ចពង្រឹងទំនាក់ទំនងពាណិជ្ជកម្ម និងវិនិយោគដោយតុល្យភាពនិងសុខដុមរមនាជាមួយប្រទេសនានាក្នុងពិភពលោក តាមរយៈបណ្តាញខុទ្ទកាល័យតំណាងក្រៅប្រទេសចំនួន ៧៥ នៃប្រទេស ៥៥ និងខុទ្ទកាល័យតំណាងចំនួន ៥២ នៃប្រទេសជប៉ុន។ នៅវៀតណាម JETRO មានខុទ្ទកាល័យតំណាងចំនួន ០២ (ទីក្រុងហាណូយ និងទីក្រុងហូជីមិញ) ហើយថ្មីៗនេះបានបង្កើនទំនាក់ទំនងកិច្ចសហប្រតិបត្តិការជប៉ុន-វៀតណាម ដូចជាការកែលម្អបរិយាកាសអាជីវកម្មនិងជំរុញវិស័យវិជ្ជាជីវៈឧស្សាហកម្ម និងការនាំចេញទំនិញ។ ពង្រីកទីផ្សារ សមាហរណកម្មសេដ្ឋកិច្ចតំបន់ និងអន្តរជាតិនិងអភិវឌ្ឍន៍ធនធានមនុស្ស។ល។
នាពេលខាងមុខ លោក Okabe Mitsutoshi - ប្រធានតំណាងខុទ្ទកាល័យ JETRO សង្ឃឹមថា គណៈកម្មាធិការប្រជាជនខេត្តអានយ៉ាង រួមជាមួយនឹងមន្ទីរ គណ ផ្នែកថ្នាក់ខេត្តនឹងគាំទ្រយ៉ាងសកម្មដល់ធុរកិច្ចជប៉ុនដែលកំពុងដំណើរការ និងវិនិយោគនៅលើភូមិសាស្ត្រខេត្ត។ បន្តកែលម្អបរិយាកាសវិនិយោគ កែលម្អទម្រង់បែបបទរដ្ឋបាល បង្កើតលក្ខខណ្ឌអំណោយផលដើម្បីទាក់ទាញធុរកិច្ច។ បន្តជំរុញខ្លាំងសកម្មភាពសហប្រតិបត្តិការរវាងវៀតណាម និងជប៉ុន ក៏ដូចជាធុរកិច្ចអានយ៉ាង និងជប៉ុន ក្នុងស្មារតីភាគីទាំងពីរមានផលប្រយោជន៍។
ថ្លែងមតិក្នុងកិច្ចប្រជុំ លោក ហូវ៉ាន់ម៉ឹង ប្រធានគណៈកម្មាធិការប្រជាជនខេត្តអានយ៉ាង បានឲ្យដឹងថា គណៈកម្មាធិការប្រជាជនខេត្តអានយ៉ាង មានសេចក្តីសោមនស្សរីករាយជាខ្លាំងក្នុងខណៈដែលបានទទួលលោក Okabe Mitsutoshi ប្រធានតំណាង JETRO នៅទីក្រុងហូជីមិញ រួមជាមួយសមាជិកគណៈប្រតិភូមកបំពេញទស្សនកិច្ច និងធ្វើការនៅខេត្តអានយ៉ាង។ អានយ៉ាងក៏ជា មូលដ្ឋានមួយក្នុងចំណោមមូលដ្ឋានមានទំនាក់ទំនងសហប្រតិបត្តិការជាច្រើនជាមួយដៃគូជប៉ុន រួមចំណែកក្នុងការរឹតបណ្តឹងទំនាក់ទំនងមិត្តភាពរវាងជប៉ុន និងវៀតណាម ជាក់ស្តែងគឺការទំនាក់ទំនងសហប្រតិបត្តិការជាមួយទីក្រុង Kobe ខេត្ត Yamaguchi ក្នុងវិស័យ៖ បរិស្ថាន ផ្គត់ផ្គង់ទឹក ដោះស្រាយទឹកសំណល់ កសិកម្ម មជ្ឆជាតិ និងទេសចរណ៍។ បច្ចុប្បន្ននេះ ខេត្ត ក៏កំពុងពិភាក្សាជាមួយខេត្ត Shiga អំពីបញ្ហាកាកសំណល់ ភក់ ទម្រង់ជំរុញសេដ្ឋកិច្ចរង្វង់ កាត់បន្ថយការបំភាយកាបូននៅលើភូមិសាស្ត្រខេត្តអានយ៉ាង។
ខេត្តអានយ៉ាង បានសហការជាមួយធុរកិច្ចជប៉ុនក្នុងវិស័យជាច្រើនដូចជា៖ បរិស្ថាន ផ្គត់ផ្គង់ទឹក ដោះស្រាយទឹកសំណល់ កសិកម្ម វារីវប្បកម្ម ទេសចរណ៍ និងសុខាភិបាល។ លោកអគ្គកុងស៊ុលស្ថានទូតជប៉ុនជារៀងរាល់ឆ្នាំបានគាំទ្រដល់ស្ថាប័ន គណផ្នែក និងមូលដ្ឋាននានានៅក្នុងខេត្ត ឲ្យទទួលបានកម្មវិធីជំនួយដែលគ្មានសំណង។ គិតមកដល់បច្ចុប្បន្ននេះ ខេត្តបានអនុម័ត និងផ្សព្វផ្សាយអនុវត្តគម្រោងបានចំនួន ១៤ ពីកម្មវិធីនេះ ជាមួយនឹងសកម្មភាពដូចជា ផ្តល់បរិក្ខារពេទ្យ សម្ភារៈកសិកម្ម សាងសង់ស្ពានជនបទ និងសាលារៀន។
ក្នុងកិច្ចប្រជុំថ្ងៃនេះ លោកប្រធានគណៈកម្មាធិការប្រជាជនខេត្ត សង្ឃឹមថា អង្គការ JETRO នឹងចូលរួមអំពាវនាវដល់វិនិយោគគិនជប៉ុន ឲ្យចូលរួមអភិវឌ្ឍន៍និងពង្រីកទម្រង់ដឹកនាំសាធារណៈ និងអភិបាលកិច្ចឯកជន នៅក្នុងតំបន់ឧស្សាហកម្មលើភូមិសាស្ត្រខេត្តអានយ៉ាង នាពេលខាងមុខ ក៏ដូចជាយកចិត្តទុកដាក់ ដល់គម្រោងរបររកទទួលទាន របបសន្តិសុខសង្គម បរិស្ថាន សុខាភិបាលជាដើម ជាពិសេសគឺកិច្ចសហប្រតិបត្តិការជំរុញការអំពាវនាវវិនិយោគអំពីឧស្សាហកម្មកែច្នៃកសិកម្ម និងគ្រឿងសមុទ្ទ៕
ប្រែ៖ ណារីពៅ
