នៅព្រឹក ថ្ងៃទី ៤ ខែមករា លោក ឡេ ទ្រុងហូ អនុប្រធានគណៈកម្មាធិការប្រជាជនខេត្តអានយ៉ាង បានដឹកនាំគណៈប្រតិភូមួយក្រុមអញ្ជើញទៅត្រួតពិនិត្យជាក់ស្តែង សួរសុខទុក្ខ និងលើកទឹកចិត្តកម្មាភិបាល និងកម្មករដែលកំពុងធ្វើការនៅការដ្ឋានសំខាន់ៗនៅលើភូមិសាស្ត្រាខេត្ត។
លោក ឡេ ទ្រុងហូ អនុប្រធានគណៈកម្មាធិការប្រជាជនខេត្តអានយ៉ាង បានត្រួតពិនិត្យការសាងសង់ប្រព័ន្ធដំបូលការពាររណ្តៅវត្ថុបុរាណនៅទីតាំងវត្ថុបុរាណអ៊ុកអែវ - បាថេរ (ឃុំអ៊ុកអែវ) និងគម្រោងគម្រោងលើកកម្ពស់ ពង្រីកផ្លូវខេត្តលេខ ៩៤១ (ផ្នែកពីស្ពានលេខ ១៦ ដល់ចំណុចប្រសព្វនៃផ្លូវ ៣ កុម្ភៈ និងផ្លូវហ៊ុងវឿង) និងគម្រោងសមាសភាគទី ១ ស្ថិតក្នុងគម្រោងវិនិយោគសាងសង់ផ្លូវល្បឿនលឿនចូវដុក - កាន់ធើ - សុកត្រាំង ដំណាក់កាលទី ១ (ផ្នែកចំណុចប្រសព្វនៃផ្លូវខេត្តលេខ ៩៤១ គ.ម២៨+៥៩១)។
តាងនាមថ្នាក់ដឹកនាំខេត្ត លោកអនុប្រធានគណៈកម្មាធិការប្រជាជនខេត្ត បានទទួលស្គាល់ និងសរសើរចំពោះស្មារតីទទួលខុសត្រូវរបស់វិនិយោគគិន អង្គភាពសាងសង់ និងក្រុមកម្មករ ដែលបានស្នាក់នៅនឹងការដ្ឋានដើម្បីធ្វើការឆ្លងថ្ងៃបុណ្យទានធំៗ និងបុណ្យចូលឆាំ្នវៀតណាម។
លោក ឡេ ទ្រុងហូ បានសង្កត់ធ្ងន់ថា ការធ្វើការថែមម៉ោង និងវេនបន្ថែមមិនត្រឹមតែធានាបានល្បឿនតាមផែនការប៉ុណ្ណោះទេ តែថែមទាំងបង្ហាញពីការប្តេជ្ញាចិត្តរបស់ខេត្តទាងមូលក្នុងការបញ្ចប់ផែនការបញ្ចេញថវិកាវិនិយោគសាធារណៈផងដែរ។
ជាពិសេស សម្រាប់គម្រោងប្រព័ន្ធដំបូលនៅអ៊ុកអែវ-បាថេរ លោកអនុប្រធានគណៈកម្មាធិការប្រជាជនខេត្ត បានកត់សម្គាល់ថា នេះគឺជាសំណង់មានអត្ថន័យពិសេស ក្នុងបរិបទដែលខេត្តកំពុងសហការជាមួយក្រសួង ផ្នែកមជ្ឈិមដើម្បីបំពេញឯកសារដាក់ជូនអង្គការយូណេស្កូទទួលស្គាល់ជាតំបន់បេតិកភណ្ឌវប្បធម៌ពិភពលោក។
បានសន្និដ្ឋានថា នៅក្នុងខែមិថុនា ឬកក្កដា ឆ្នាំ២០២៦នេះ គណៈប្រតិភូអង្គការយូណេស្កូនឹងមកធ្វើការត្រួតពិនិត្យជាក់ស្តែងនៅទីនេះ។ ដូច្នេះ ការបញ្ចប់ការសាងសង់ដំបូលការពារ និងហេដ្ឋារចនាសម្ព័ន្ធបច្ចេកទេសស្របតាមកាលកំណត់ និងធានាគុណភាពដើម្បីការពារវត្ថុបុរាណដែលបានជីកកកាយ គឺជាភារកិច្ចពចម្បង។ សើ្នអង្គភាពសាងសង់ឲ្យមានការប្រុងប្រយ័ត្នខ្ពស់បំផុត ជៀសវាងការបំផ្លាញវត្ថុបុរាណ និងថែរក្សាឲ្យបានគង់វង់នូវតម្លៃប្រវត្តិសាស្ត្រក្នុងដំណើរការសាងសង់។
ទៅទន្ទឹមនិងតម្រូវការអំពីល្បឿនដំណើរការ និងគុណភាព សមមិត្ត លេ ទ្រុងហូ បានរម្លឹកដល់អង្គភាពនានាឲ្យយកចិត្តទុកដាក់ជាពិសេសដល់ការងារសុវត្ថិភាពការងារ ការរក្សាន័យនៅការដ្ឋានសំណង់ និងធានាសុខភាពរបស់កម្មករ។
ក្នុងឱកាសឆ្នាំថ្មី ២០២៦ លោកអនុប្រធានគណៈកម្មាធិការប្រជាជនខេត្ត បានប្រគល់អំណោយ និងជូនពរដល់កម្មករសំណង់ទាំងអស់ឲ្យមានសុខភាពល្អ។ ហើយលោកក៏សម្តែងនូវក្តីសង្ឃឹមថា អង្គភាពនានានឹងពង្រីកស្មារតីសាមគ្គីភាព និងខិតខំជម្នះការលំបាកជាបន្តទៀត ដើម្បីបញ្ចប់គម្រោងសាងសង់ឲ្យឆាប់រហ័ស៕
ប្រែ៖ សំណាង
