នៅរសៀលថ្ងៃទី៨ ខែមេសា លោកវរសេនីយ៍ឯក ចៅចាក់ ស្នងការរងនយោបាយនៃបញ្ជាការដ្ឋានយោធាខេត្ត តំណាងរាស្ត្ររួមជាមួយនិងគណៈប្រតិភូបានអញ្ជើញទៅសួរសុខទុក្ខ និងជូនអំណោយក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ ២០២៥ នៅវត្តព្រះស្ទឹង ឃុំកាន់ដាំង ស្រុកចូវថាញ់។ អមដំណើរជាមួយគណៈប្រតិភូមានលោកស្រី ឡេប៊ិតភឿង សមាជិកបក្ខភាគខេត្ត លេខាបក្ខភាគស្រុក។ លោក ហូហ៊ូតៃ សមាជិកគណៈអចិន្ត្រៃបក្ខភាគស្រុក អនុប្រធានគណៈកម្មាធិការប្រជាជនស្រុក។ លោកវរសេនីយ៍បម្រុង វ៉វ៉ាន់កាង សមាជិកបក្ខភាគស្រុក ស្នងការនយោបាយនៃបញ្ជាការដ្ឋានយោធាស្រុក។ រួមជាមួយថ្នាក់ដឹកនាំឃុំកាន់ដាំង។
នៅកន្លែងនីមួយៗ តាងនាមបញ្ជាការដ្ឋានយោធាខេត្ត លោកវរសេនីយ៍ឯក ចៅចាក់ ស្នងការរងនយោបាយនៃបញ្ជាការដ្ឋានយោធាខេត្ត តំណាងរាស្ត្របានផ្តល់ព័ត៌មានមួយចំនួនអំពីស្ថានភាពអភិវឌ្ឍន៍សេដ្ឋកិច្ចសង្គម និងលទ្ធផលលេចធ្លោមួយចំនួនដែល កងកម្លាំងប្រដាប់អាវុធខេត្តសម្រេចបានក្នុងការបំពេញភារកិច្ចយោធា និងការពារជាតិនៅប៉ុន្មានខែដើមឆ្នាំ២០២៥។ លោកវរសេនីយ៍ឯក ចៅចាក់ បានសួរសុខទុក្ខសុខភាពនិងប្រគេនពរដល់ព្រះតេជគុណ គណៈគ្រប់គ្រងវត្ត និងបងប្អូនជនរួមជាតិខ្មែរ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឲ្យជួបតែសេចក្តីសុខ សេចក្តីចម្រើន សុខសាន និងសុភមង្គល។ ទន្ទឹមនឹងនោះសង្ឃឹមថា ព្រះតេជគុណ និងគណៈគ្រប់គ្រងវត្ត នឹងជាស្ពានតភ្ជាប់ដើម្បីផ្សព្វផ្សាយគោលការណ៍របស់បក្ស គោលនយោបាយ និងច្បាប់របស់រដ្ឋទៅដល់បងប្អូនជនរួមជាតិខ្មែរ រួមដៃជាមួយអាជ្ញាធរមូលដ្ឋានថែទាំរបបសន្តិសុខសង្គមជូនប្រជាជនឲ្យបានល្អ។
តាងនាមព្រះសង្ឃ និងពុទ្ធបរិស័ទ ព្រះតេជគុណ ចូវហុង ព្រះចៅអធិការវត្តព្រះស្ទឹង បានសម្តែងនូវអំណរគុណចំពោះការយកចិត្តទុកដាក់ និងថែទាំរបស់បញ្ជាការដ្ឋានយោធាខេត្តចំពោះសហគមន៍ជនរួមជាតិខ្មែរនិយាយរួមនិងចំពោះព្រះសង្ឃ និងពុទ្ធបរិស័ទខ្មែរឃុំ កាន់ដាំង និយាយដោយឡែក៕
ប្រែ៖ ណារីពៅ
